திராவிட இயக்கம் - பேரா க. அன்பழகன்

 திராவிட இயக்கம் - பேரா க. அன்பழகன்

திமுகவின் உயர் தலைவர் பேரா க. அன்பழகன் அவர்களின் திராவிட இயக்கம் எளிய சுருக்கமான ஆனால் subject matterல் கவனப்பிசகு இல்லாமல் இருக்கிற புத்தகம்.

பேராசிரியர் கல்வி அமைச்சராக இருந்தபோது சென்னை பல்கலை கருத்தரங்கத்தில் ஏப்ரல் 27, 1978ல் அவர் ஆற்றிய உரையை தருமபுரி நண்பர்கள் செப் 2022ல் நேர்த்தியாகக் கொண்டுவந்துள்ளனர்.

சுவாமி விவேகானந்தர், மகாகவி பாரதியார் மேற்கோள் மற்றும் பாரதியார் இந்து பத்திரிகைக்கு எழுதிய கடிதம் ஆகியவற்றை அன்பழகன் எடுத்தாண்டுள்ளார்.

இராமசாமி சாஸ்திரியின் The Hindu Culture, தத்துவ அறிஞர் டாக்டர் இராதாகிருஷ்ணன் ஆய்வு முடிவுகளை அன்பழகன் தனது உரையில் தொட்டுக்காட்டுகிறார். கே எம் பணிக்கரின் A Survey of Indian History யை தன் உரைக்கு துணையாக பேராசிரியர் எடுத்துக்கொண்டுள்ளார்.

அதேபோல் Non Brahmin Regeneration in South India என்ற நூலையும் பேராசிரியர் எடுத்தாள்கிறார். இது அநேகமாக காசிநாத் கவ்லேக்கர் எழுதியதாக இருக்கலாம் எனக் கருதுகிறேன். பலராலும் அடிக்கடி பேசப்படும் வாலெடின் சிரோலின் Indian Unrestயையும் அவர் சுட்டிக்காட்டுகிறார். புகழ் வாய்ந்த சர் சி சங்கரன் நாயரின் கருத்துக்களையும் உரையில் பேராசிரியர் கொணர்ந்துள்ளார். சங்கர நாயரின் கருத்தை மறுத்தவரை விமர்சித்து இந்துவிற்கு பாரதி எழுதிய கடிதத்தை சுட்டிக்காட்டுகிறார்.

வரலாற்று அறிஞர் பி டி சீனிவாச அய்யங்காரின் pre Aryan culture, History of the Tamils இரண்டையும் தனது உரையின் மய்ய கருத்திற்கு பேராசிரியர் பயன்படுத்துகிறார். நாரயண குருவின் சீடர் தரும தீர்த்தா எழுதிய History of Hindu Imperialism என்பதிலிருந்தும் மேற்கோள் உரையில் தரப்பட்டுள்ளது.

பின்னர் தியாகராயர், நாயர், நடேசன் , பெரியார், அண்ணா போன்றவர்களின் செயல்பாடுகளை ஓரளவிற்கு அன்பழகன் தொட்டுக்காட்டுவார். பெரியார் அண்ணா ஒப்பீடு மிக subtle ஆக செய்யப்பட்டிருக்கும். இருவருக்குமான பிணைப்பும், வேறுபாடுகளும் குறிப்பிடப்பட்டிருக்கும். முரண்களை பகையாக காட்டாமல் நட்பு முரண்பாடாக அண்ணாவால் கையாளைப்பட்டதை பேராசிரியர் குறிப்பிட்டு சொல்லுகிறார்.

இந்த உரைதனில் பேராசிரியர் பல்வேறு சான்றாதார நூல்களின் துணையுடன் கீழ்கண்ட வைப்புகளை தந்துள்ளதைக் காணமுடிகிறது.

திராவிடர் சமய நெறியின் சிறப்பு இறை உருவ வழிபாடு

திராவிடர் மதத்தன்மையான உருவ வழிபாட்டை ஆரியர் ஏற்றனர்

வேதமதம் கடவுள் நம்பிக்கை மதமாக திராவிடத்தொடர்பால் மாற்றமடைந்துள்ளது.

திராவிடர் அறிவின் சாயல் பலவற்றை ஆரியர் சம்ஸ்கிருதத்தில் எடுத்துக்கொண்டனர்

ஆரிய வந்தேறிகள் எண்ணிக்கை 4 லட்சத்தை அன்றைக்கு மிகுந்திருக்காது.

தென்னாட்டை மூல வாழ்விடமாகக் கொண்டிருந்த திராவிடர்களிடமிருந்துதான் ஆரியர் நாகரிக சிந்தனைகளைப் பெற்றனர்.

இந்திய நாகரிகம் வேதகாலத்திற்கு முறபட்ட ஒன்று. இந்து மதத்தின் இன்றிமையாத பண்பாட்டுக் கூறுகள் மொகஞ்சதாரோ திராவிடர்களிடமிருந்து பெறப்பட்டவை.

சிவனும் காளியும் லிங்க வழிபாடும் இந்து மதத்தின் பிற கூறுபாடுகளும் ஆரியர் வருகைக்கு முன்பே இந்தியாவில் நிலைகொண்டிருந்தவையாகும்

அரக்கரும் பிராம்மணரும் சேர்ந்து உருவான கோத்திரம்தான் பிரம்மராட்சச கோத்திரம்

பிராமணியத்திற்கு பெரும் செல்வாக்கு ஆதிக்கம் தென்னாட்டில் கிடைத்ததைப் போன்று வேறு எங்கேயும் கிடைக்கவில்லை. அவர்கள் வல்லாண்மையுடன் ஆசார சம்பிரதாயங்களில் மட்டுமல்லாமல், அரசியல் பொருளாதார தலைமையையும் வைத்திருந்தனர்.

பிராமணர்கள் போற்றிய மொழி, மதம், கலாச்சாரம் தனி ஆதிக்கச் சக்தியாக வளர்ந்ததால், தமிழ்மொழி, இசை, கலை, நாகரீகம், பண்பாடு , சமய சிந்தனைகள், சித்தர் வழிபாடு, ஆட்சி முறை மதிப்பிழந்து போயின.

இழந்தவற்றை மீட்க தென்னிந்திய நலவுரிமை சங்கம், நீதிக்கட்சி, சுயமரியாதை இயக்கம், திராவிடர் கழகம், திமுக உருவாகி செயல்பட வேண்டிய சூழல் உருவானது.

எம்ஜிஆர் பிரிந்து போனதை சொன்னாலும் அது குறித்து தான் ஒரு கட்சிக்காரராக இருப்பதால் பல்கலை உரையில் பேச முடியவில்லை என பேராசிரியர் குறிப்பிட்டுள்ளார். நீதிக்கட்சி இட ஒதுக்கீட்டில் பிராமணர்களுக்கும் இட ஒதுக்கீடு இருந்ததை அவர் சொல்வார். அண்ணாவின் ஆட்சியை தொடர்ந்த திமுகவின் நலத்திட்டங்களை பேச நேரமில்லை என அவர் உரை முடிந்திருக்கும். வாய்ப்புள்ளவர் படித்துப் பார்க்கலாம்.