பெரியவர்கள் முரண்கள்

 

பெரியவர்கள் முரண்கள்

அரசியல் உலகில்  , சமய உலகில் கூட  ஒரு குறிப்பிட்ட விஷயத்தில், எல்லா தருணங்களிலும் ஒரே மாதிரியான கருத்தையே ஒருவர் சொல்லிக்கொண்டிருந்தார்  என பொதுவாக பார்க்கமுடிவதில்லை. காந்தி பல தருணங்களில் முன் பேசியதை விட்டு மாற்றி பேசியிருப்பார். இந்த முரண் குறித்து பேசும்போது, அந்த அந்த கணத்தில் உண்மையென தான் உணர்வதை சொல்லவேண்டியிருப்பதை அவர் விளக்கியிருப்பார். இறுதியாக சொன்னதை தனது கருத்தாக எடுத்துக்கொள்ளுங்கள் என்பார்.

ராஜாஜி கூட இந்தியை திணித்தார் என்ற பெயரைப்பெற்று போராட்டங்களை சந்தித்தவர்தான். பிற்காலத்தில் இந்தி திணிப்பு கூடாது என்ற கருத்தை அவர் வெளிப்படுத்தலானார்.

பெரியார் அவர்கள் இந்தி திணிப்பு எதிர்த்து கடுமையாக போராடியவர் என்கிற அம்சம் அனைவருக்கும்  தெரியும். ஆனால் அவரும் சாவி அவர்களுக்கு கொடுத்த பேட்டியில் சற்று மாறுபட்ட சிந்தனையை வெளிப்படுத்தியிருந்தார். ஹிந்தியால் கெடுதல் இல்லை என அவர் பேசியதைக் காண்கிறோம்.

திமுக பிரிந்து அது வளர்ந்த 1960 களில்,  காங்கிரஸ் எதிர்ப்பில் ராஜாஜி திமுக உறவு மலர்ந்து விரிந்தது.

“ மக்களுக்கு தேவைப்படுகிற காலம் வரையில், ஆங்கிலம் மாற்று மொழியாக எவ்வளவு காலத்துக்கு என்பது ஹிந்தி பேசாத மக்களிடத்தில் விடப்படவேண்டும்” என்கிற நேருவின் உறுதிமொழி நிலைக்குமா என்ற சந்தேக நிலையில் திமுக போராட்ட அறிவிப்பை செய்தது.

தோழர்  கேடிகே தங்கமணி அப்போது எம் பி.  ஈ வெ கி சம்பத் அவர்களும் எம் பி.  நேரு சம்பத்தை சந்திக்க வர வேண்டுகிறார். சம்பத் தயங்கினார். தங்கமணி அவரை நேருவிடம் அழைத்துச் சென்றார். சம்பத் கடிதத்திற்கு, நேரு உடன் பதில் தந்தால், அதை எடுத்துப்போய், திமுக போராட்டத்தை கைவிட வைக்கலாம் என சம்பத் ஏற்கிறார். நேருவும் சந்தேகம் தேவையில்லை என்கிற நம்பிக்கையை எழுதி தந்தார். உடன் விமான பயணம் மூலம், சென்னை வந்து சம்பத் அண்ணாவிடம் எடுத்துச் சொல்லி போராட்டம்  கைவிடப்படுகிறது.

உள்துறை  அமைச்சர் சாஸ்திரி அவர்கள் 1965 ஜனவரி 26 ல் ஹிந்தி ஆட்சிமொழியாகும்  என்று 1963ல் கொடுத்த அறிவிப்பால், அரசியல் சட்டம் கொளுத்துவோம் என திமுக 1963 இறுதியில் அறிவித்தனர்.

பெரியார் 1952ல் கூட ஹிந்தி எழுத்துக்களை அழிப்போம் என்ற போராட்டத்தைத்தான் மேற்கொண்டவர்.  ஆனால் 1960 களில் அவர் வேறுவகையில் பேசலானார்.

2-6-1963ல் “ இந்தியா யூனியனாக இருக்கும்வரை ஹிந்தியை அசைக்க முடியாது. நாம் ஒண்டிக்குடி. அசைக்க வேண்டுமெனில் பலாத்காரத்தில் இறங்கவேண்டும். அவ்வளவு தூரம் போக இப்போது அவசியமில்லை. ஆகவே ஹிந்தியைப் பற்றி பேசுவது வீண் என்று முடிவு செய்து விட்டேன் “ என்றார்

1965 போராட்ட காலத்தில் அவர் பேசியது

“ ஹிந்தி எதிர்ப்பு என்ற பெயரில் நடைபெற்ற காலித்தனம்..தமிழ் நாட்டில் எங்கே ஹிந்தி இருக்கிறது - யார்  கட்டாயப்படுத்தினார்கள்…ஆரம்பத்திலேயே நான்கு காலிகளை சுட்டு இருந்தால் , நாச வேலைகளும்,உயிர் சேதமும் உடைமைக் சேதமும் ஏற்பட்டிருக்காது..எதற்காக சட்டம் போலீஸ்..இது என்ன அரசாங்கம் வெங்காய அரசாங்கம் “

19-1-1965 ல் அவர் இவ்வாறு கடுமையாக சொன்னதைப் பார்க்கிறோம்

சுதந்திரா கட்சி, கண்ணீர்த் துளி கட்சி ஆகிய இரண்டையும் தடை செய்யுங்கள்..பத்திரிகைகளுக்கு வாய்ப்பூட்டு போடுங்கள்

11-4-1965 சாவிக்கு ஆனந்த விகடன் பேட்டியில் பெரியார் இவ்வாறு கருத்து தெரிவித்தார்

“ இப்போது ஹிந்தி எங்கே இருக்கிறது..சொல்லுங்கள்

எங்கே ஹிந்தி ஆட்சி மொழியாக வந்துவிட்டது..உங்களுக்குத்தான் ஆங்கிலம் இருக்கிறதே. இந்தியா ஒன்றாக இருக்க வேண்டுமானால் ஓர் ஆட்சி மொழி வேண்டியது தானே..ஹிந்திக்காரன் உங்களைப் போல ஆங்கிலத்தை நினைக்கவில்லையே..தமிழ் நாட்டுக்காரன் சொல்றபடி நடக்குமா? அது மக்களாட்சியா?

ஹிந்தி வந்தால் நீ இரண்டாந்தரக் குடிமகன் ஆகிவிடுவேன் என்று சொன்னால் , ஹிந்திக்காரன் ஆங்கிலம் வந்தால் மூன்றாந்தரக் குடிமகன் ஆகிவிடுவேன் என்று சொல்வான்..”

காந்தியின் எழுத்துக்கள் முழுமையாக, மறைக்கப்படாமல் எந்த வடிகட்டலும் இல்லாமல் கிடைப்பது போல, மக்களிடம் பெரும் அரசியல் செல்வாக்கு செலுத்தக்கூடியவர் எழுத்துக்கள் அனைத்தும் வெளிப்படையாக  - அது இந்திய கம்யூனிஸ்ட் இயக்க எழுத்தானாலும்- திராவிட இயக்க எழுத்தானாலும்- அம்பேத்கரிய எழுத்தானாலும்- வலதுகளின் எழுத்தானாலும்- லிபரல் மற்றும் சோசலிஸ்ட்களின் எழுத்தானாலும் அனைத்தும் - இந்திய அரசியல் குறித்த மேம்பட்ட புரிதலுக்காக கிடங்காக கொட்டி வைக்கப்பட வேண்டும்.

எவர் குறித்தும்  முரண் இல்லா uni dimensional understanding என்பது சரிதானா என்ற கேள்விக்கான நியாயம் , அவர்கள் எழுத்தில் மறைப்புகள் தராத publications or e publications மூலம்தான் சாத்தியமாகும். இதிலாவது மக்களுக்கு நியாயம் செய்திட சம்பந்தபட்ட இயக்கங்கள் கருணை காட்ட வேண்டும்…இந்த நேரத்தில் இது குறித்து இந்த சூழலில் இப்படியான நிலைப்பாடு என்கிற வரலாற்றுணர்வு உருவாக்கிட அரசியல் வழி செய்ய வேண்டும் என்பது விழைவு..